中東空姐獨遊記｜Armenia 之 冒失事件

生活在大城市，疑心都會重一點，對於路上有陌生人走過來同你搭話，一定會諗到底依個人有咩企圖。上個月去完伊朗之後，就發現其實世界上仲有好多地方既人仲係好簡單同純樸。
今次黎到亞美尼亞(Armenia)都仲有咁既好人好事事件發生！ 

今個旅程由於bid唔到dayoff既關係，只係得短短既兩日，於是我當然又chur爆咁兩日去兩個tour啦！對於生活在城市既我來講，想睇既野通常都唔係城市野！不過Yerevan作為一個前蘇聯國家既首都亦有著另一番味道！

查詢去Armenia的機票

Armenia 有名的 Khor Virap，在這可以遠望Armenia人的神山Ararat，可惜Ararat目前已在土耳其境內

第一日既tour識到個挪威弟弟，雖然係弟弟但由於佢細細個就同屋企人周遊列國，見識廣博，又鐘意自己一個人去旅行，所以大家諗法差不多，傾得好投契！（利申：純friend）第二晚我地又約埋一齊食飯，食到人地間餐廳要關門，我地就轉場飲下野繼續吹水！我地都覺得Armenia人都好純樸好簡單既人。坐左一陣，佢發現，佢留左個袋係之前間餐廳！而佢本護照就放左係個袋入面。

遊人以半行半爬的方式行上教堂的第二層。
附上挪威弟弟背面照一枚

之後我地又急急腳咁番去間餐廳睇下啦！點知侍應走晒，得番個唔多識講英文既叔叔，咁咁岩有個路人行過，咁我地就隨手問佢可唔可以幫手做翻譯，佢又肯喎！一輪翻譯之後既結論係個叔叔搵唔到已經收左工既侍應，唔知佢地如果執到的話放左去邊，所以就叫挪威弟弟聽朝再打比佢問。呀弟弟好擔心，唔係怕比人偷走佢本護照，而係因為最近既挪威領事館係莫斯科，姐係如果真係搵唔番，佢就係Armenia有排等！

之後我地就各自番hostel啦！零晨一時，Yerevan 街頭還未算冷清，我係個廣場度等巴士坐車去機場。等左冇耐就有兩個唔係好識英文既local過黎問我有咩要幫手，問我要去邊。我：我要去機場

佢地：夜晚冇巴士嫁喎！

我：我上網搵到話有嫁喎！


之後佢打左比個識講英文既朋友同我講，話佢地可以幫我搵的士去機場，3000蚊dram (hostel幫手叫的士要4000-6000 dram)

咁我唔想趕唔切去機場，而local又話冇車，咁好啦！點知佢見我有點猶豫就話2000dram就得啦！好啦咁，叫佢幫我搵車啦！

點知原來係佢車我去機場，一上左車我既危機感先番黎，妖，岩岩挪威弟弟先唔見左護照，依加我又上左陌生人既車！點算好？佢會唔會車我去其他地方嫁？！點算好點算好！點解我咁蠢！之後我就拎左google map出黎睇佢係咪開去機場果度啦！

好好彩佢係一個好人！佢真係開去機場！當我安全到達機場既時候，我對於自己懷疑佢係壞人感到有一絲絲內疚。可能人地見我一個女仔夜晚人生路不熟，所以先車我去機場，不過作為一個獨遊女性，有危機感係正常既！但如果同一件事發生係歐洲，可能我已經比人溶左或搶晒d錢啦，仲點會平過市價的士錢去到機場？

後記：之後挪威弟弟話比我知佢搵番佢本護照，可以繼續佢既旅程啦