小編去旅行｜希臘雜談－聖托里尼/藍頂教堂/日落

去聖托里尼影藍頂教堂是常識吧！

好多人都介紹過呢個景點，但小編去到都要兜咗一大個圈先搵到，因為曾經有人分享沿海行就可以去到，但其實影相呢個位置並唔係海邊嚟架（資料搜集不足嘅後果）

影相嘅教堂係Agios Theodori Church，由Fira行去Oia嘅方向就係啦，喺地圖個位置好似海邊條路，少年你太年輕了！

其實要喺Santorini Palace 呢個位（去到會見到有車泊係附近），旁邊有條小斜路上去就係啦！所以係Google Map Search Santorini Palace係仲易搵到呢個影相位。

除咗呢個景點，小編覺得係沿海餐廳食飯已經係一大享受，當然涼涼地嘅日子都係揀間有落地玻璃嘅好。

世界級日落

仲有 Oia 入選世界級日落三甲（喺小編心目中）都係必去㗎喇！小島睇日落，最靚係見到太陽降落至一覽無遺嘅水平線，好似潛咗水一樣，則邊仲有彩霞，喺香港真係無乜邊度睇到（下白泥？）

雖然去旅行，好多國家都標榜一兩個地方睇日落好靚，但小編見過真係正嘅，除咗Oia外，仲有緬甸烏木橋。

話說回來，Oia嘅靚又多咗整個島大部份由白色小洞屋組成，又有藍洞教堂，成件事係異常之夾又浪漫。

無日落都咁靚，有日落嘅映襯真係會不禁挨住旁邊果個！好多人都會企係望向海，亦係望向Oia最篤篤，呢個方向睇日落。

網上亦好多人介紹要係 Oia Castle 碉堡欣賞日落，因為前方一望無際，你亦可借助碉堡企高啲，影出黎嘅相就唔會有人頭啦。

由於小編睇日落當日係由Fira行山去Oia，去到都好肚餓，所以我哋係餐廳度食住嘢享受呢個美景。

Pelekanos Restaurant - Bar 睇到嘅景，如果早點來到，坐到窗邊位就更加正。

我地坐係三層高嘅餐廳食飯，前面你都見到係有遮擋，影相就無咁完美，但想同情人/朋友有個舒服地方睇日落，不妨Book 間餐廳舒服咁睇，唔洗同人逼，好似小編咁住Fira嘅，就更加可以食埋飯先坐巴士返去Fira，直接返飯店，唔洗再去市中心搵食。

唔好問我呢碟咩名堂，我淨係記得啲橄欖油同埋我食完都唔多飽。

小編係聖托里尼坐過兩程巴士，一程係落船後去Fira，問人就搵到架巴士。第二程係Oia返Fira，當地巴士公司（https://www.ktel-santorini.gr/）網上班表寫20:00係尾班車，所以我地就好乘去排隊返Fira，都好多人等。再上網搵多啲資料，原來巴士公司會應因情況改動班表，winter同summer淡旺季營運時間有別，大家要留意下啦！

由聖島返雅典，我哋係一早六點幾坐飛機，係Fira去機場，的士大哥話其實唔會塞車，車程10-20分鐘到，唔洗咁早去到都得，因為真係冇乜人，機場好細的。上到機仲見到日出添呀！