小編去旅行｜希臘雜談－3月去Santorini有咩玩

小編今年 3月尾 4 月去咗希臘，同大家分享吓希臘旅遊嘅點滴！

攝於聖托里尼(2018年3月)

而家暫時香港都係未有直航飛希臘嘅，點都要轉一次機(或以上)，中東三寶都有機，所以我就揀左近期大愛嘅卡塔爾航空，由香港出發，停多哈機場，係機場Duty Free掃掃貨再起程去希臘！另外土耳其航空都有航班飛去希臘，有興趣可以留意返。

攝於多哈機場

卡塔爾航空機位夠闊，坐得舒服，電影更新又夠新，忘形水、Darkest Hour、Wonder都有得睇。但重點都係時間夠靚，係香港凌晨上機，到多哈就當地時間早上五點幾，係希臘落機就係中午十二點左右，唔會浪費你一整日。今年卡塔爾航空新增航線飛Mykonos，淨係想去小島玩/小島行程為重點可以考慮飛去Mykonos。

淡季去小島有咩做？
好多人去希臘都係想喺小島影靚相，如果係為咗影相，都可以3月、4月淡季去嘅，最多著厚些少，但呢個月份就真係不宜游水，小島比較大風、溫度比首都雅典更低，要考慮埋呢個因素。如果為左渡假、享受游住水飲紅酒嘅假期，最好都係夏天先去小島！

今次旅程時間所限，小編只係去咗Santorini，上網爬文話淡季店鋪未必開門，我去嘅時候都大約3/4有營業啦，無得游水都可以買吓嘢、食吓嘢！

小編同朋友住係 Fira，好近碼頭嘅城市，有一日就租咗架ATV去咗Oia同埋差不多環島遊咁滯。淡季租車只需要20歐，但要自行入油，入一次就可以渣一日啦。

另外有一日我地係Fira 行山去Oia，全程兩個半小時左右，行咗半個島！

行山半途中，個島最篤篤就係Oia啦!

如何去小島？
網上都好多人分享過，去小島可以坐船或飛機。船公司主要有：Seajet 同 Bluestar，主要分別是Seajet 時間比較快、價錢貴、噴射船；Bluestar時間慢長、價錢平、船身大隻。

考慮到時間關係，小編選擇咗坐Seajet 由雅典碼頭Piraeus 坐到去Santorini，7點開船，網站寫11點半左右就會到達。

結果，上船無耐就發現中！大！伏！全程最少4個鐘多啲，由於船身細、浪大，係非常之"浪"，好似喺就黎颱風嘅日子坐船去澳門咁，但係希臘嘅船程時間係4倍。坐咗個幾鐘已經勁想嘔，雖然無嘔出嚟，不過係超級唔舒服，想嘔想嘔咁。

查詢去<聖托里尼去雅典>的機票

而佢嘅賣點：時間較短亦無現實到！中途有幾個站，有客上船，其實去到Santorini 都12點幾，Delay 一個鐘，即係又唔舒服多一粒鐘。

小編返雅典果程係舒服好多，因為揀咗坐飛機，唯一要彈係要等行李囉。最多拎個Cabin Luggage囉。

帶返頭盔先：去Mykonos 都可以選擇 seajet嘅，船程得40分鐘。而由雅典出發去Santorini 真心建議大家選擇 Bluestar 或飛機喔！