旅遊保｜Delay怕甚麼

去旅行，最怕既除左唔夠錢洗之外，好多朋友仔都擔心會有Delay同天氣差。早幾日有朋友問我，係東京班機起唔到飛要點算，會有乜野保障等等。今次等我同大家分享下有乜野地方要注意一下。

係開始之前，首先要知道保險公司所謂既延誤保障，究竟係保緊因乜野事而引至既延誤呢?

＂因罷工或其他工業行動、騷亂、暴亂、劫機、「恐怖活動」、惡劣天氣、天災、「公共交通工具」的機械及/或電路故障、機場關閉而延誤＂

旅遊保中常見會有幾個關於行程延誤既保障，包括:

1.         旅程延誤

呢個保障好多朋友都知，非常簡單。只要因以上情況導致多於特定時間(通常都係每6個鐘)。就會有一個特定金額既補償。而保額上限就睇返你買個個計劃。

2.         因旅程延誤引致之額外酒店費用

要注意既係，大部分公司對呢個保障只適用於香港境外，而且需要乎合呢句

à　 ‘無法從其他途徑取回之額外住宿費用＇

3.         因旅程延誤引致之更改行程費用

保障因乘搭其他交通工具前往目的地當中產生既費用，記住一般只會比你坐經濟客位！ 係一個實報實銷既保障黎。

亦有部分公司有以下保障:

4.         超額訂票

筆者對呢個保障都覺得好吸引，因為現金上網搶平機票風氣勁，又多唔同既中介APP 去買，話唔定自已班機都超賣左，咁有呢個保障都會條氣順返少少吧！

老實講，以上幾個保障睇文字黎講就真係好簡單既。但實際上操作起來都有幾個事項要注意：

1.    一定要有航空公司所發出的延誤書面證明，清楚列出航班信息、原定起飛時間、實際起飛時間以及延誤原因，先可以一步獲得賠償。

如果唔記得左即時攞書面證明，部分航空公司都可以在網上申請返。另外，部分保險公司採用實報實銷制，所以要保留交通,飲食同住宿單據。

2.    我曾經見過有航空公司的航班延遲原因係寫 ‘因航務問題’。咁屬於航空公司既行政原因，並不在於保障範圍入面。

縱使班機改完又改，都冇辦法有賠償做到。而當發生以上情況時,大家記得去向航空公司索取補償。

總結來講，雖然旅遊保未必能夠係所有情況都可以幫到手，但都要買個安心。同埋當意外發生，可以搵返幫你買既Agent查詢。

長氣都係咁講，大家一年都會出遊幾次甚至更多，不妨花多30分鐘去搵下邊一份，邊一間公司既旅遊保係岩到大家，不同既價錢，條款都合適不同既人士。

為免賠償同自己期望有落差，都係睇清睇楚比較好，特別係直接網上購買。畢竟，有咩事都要自己一手一腳攪賠償，熟悉啲好既！

  

作者: 食啲飯

Email: stevenlui2015@gmail.com

如果有想知既題目同問題,歡迎話比我知. 下次再同大家見面。