中東空姐｜飛機餐的故事（二）

係費城回沙漠的航班，因下大雪的關係，checkin上到機的乘客比預訂人數少。本來滿艙的航班變為只有一半人數，嘩真係開心死我地！

美國機我地叫佢做超長版印度機，因為大部分都是印度或巴基斯坦乘客，但係依班機有一半都係東亞亞洲人，嘩咁易做，真係覺得上天真係對我地好好呀！

在登機的時候，有一個老婆婆引起左我既注意。佢係一個需要輪椅輔助的老婆婆，身穿南亞服裝，非常瘦小，行兩步路都震震下咁。

平日登機時候最想避開果d聲稱坐輪椅，但行路仲快過我，身體睇上去又強壯過我好多倍，中氣十足，然後好冇禮貌老奉咁要我幫佢放個肯定超過10kg既行李上去overhead bin既南亞人！但係見到依個獨自坐飛機既瘦弱老婆婆，我立刻9衝上前幫佢放行李。

好幾次送餐佢都好有禮貌同笑容，臨近降落的最後一次出餐服務，佢問我有冇d野食可以比佢帶走，再同佢傾落先知原來佢坐完依班13個鐘既飛機，仲要係機場等16個鐘，坐第二間航空公司既機去斯里蘭卡。我當然第一時間話比婆婆知我地公司一日有3-4班機去斯里蘭卡啦！（crew作為brand ambassador 當然要幫公司宣傳下啦）之後做完野，我就拎左好多之前service派唔晒既餅同朱古力比婆婆。然後婆婆臉上露出一個滿足既笑容。

我要講既唔係我有幾nice (我知我係😎），而係婆婆佢既一個笑容，已經係我工作既原動力！係服務性行業工作，雖然唔比人鬧已經好開心，但係真正既開心同滿足，係見到自己既付出換來客人由心而發既笑容，係比起每個月都可以去旅行開心！

所以有時做客人果陣，我都唔會吝嗇「唔該」、「多謝」同埋笑容。當然啦，唔係每班機每個月都會經歷咁既事，所以大部分時間我都係為可以去旅行而開心！