旅遊保保甚麼？

去旅行，搭車又搭船。快食保濟丸～ 除左要食保濟丸之外。其實有樣野都一定唔少得—旅遊保險。 

相信大部分朋友仔出發前都會買旅遊保。但敢問一句，保濟丸就搭車搭船個時食啦，你又知唔知旅遊保險包左邊幾個範圍呢?

今次會先簡單介紹一下普遍旅遊保險會有邊幾個方面既保障範圍，等大家除左買之外，亦都知道幾時有運用到既權利。 

宏觀睇睇各大供應商，不難發現主要保障6個範圍：
1. 醫療及有關費用
2. 個人意外
3. 個人責任
4. 物件上既保障
5. 行程上更改既保障
6. 海外緊急援助 

小弟係過去既日子發現，不少朋友仔都以為旅遊保係包飛機延遲，唔見行李等等…… 而往往忽略左旅遊保最緊要既醫療及有關費用和個人意外等範疇。 

醫療及有關的費用
人在外地，周不時會水土不服。去旅行本身時間已經有限，仲要唔舒服真係好慘，又怕拖累同行朋友。結果拖下拖下，去到旅行中段就頂唔順就唯有係酒店瞓埋之後既日子。可能好多朋友都會試過呢個情況，如果發生以上情況，其實大家可以係當地睇醫生。好多城市都會有專門比外國人睇醫生既診所/醫院，既可以用英文溝通之餘，甚至會有翻譯陪你見醫生。而呢個情況下睇醫生，比完錢攞齊收據同醫生診斷證明，返到香港就可以向旅遊保公司Claim返醫療洗費啦。當然要注意如果係出發前已患有既疾病、已存在的病患當然唔會保障在內。 

個人意外
人生路不熟，又要成日搭唔同交通工具，有時都會聽到有意外會發生。旅遊保有一部分就係包左因旅程中受傷既保障。同個人意外保險相似，都係有個保障表既。 如果受傷程度係嚴重到係保障表範圍內，就會根據你買既保額按比例做返個賠償， 就唔似醫療費用咁實報實銷了。簡單比幾個例子大家，如果因意外死亡，就會賠償保額既100%；如果因為意外而令我雙耳永久失聰，通常都係保額既75%。亦需要由合格及獲發牌照／註冊醫生去發出證明。 

(只供參考，實質情況要按客人買的保險而定)

個人責任
好多朋友都會問我，點解旅遊保會有個人責任係到，我去旅行仲有咩責任? 查實呢個保障就真係好重要既。舉行例子，如果係美國大峽谷唔小心轉身個時撞左個人落山，人地殘廢左要告你，向你追討佢人生餘下日子既生活費。講緊既都係天文數字，而你又陷入官司之中。大拿拿幾百萬你又冇，咁點算? 個人責任保障就正正幫你解決在旅程中因意外導致須向第三者所負的法律責任。咁當然要第一時間通知保險公司，跟返法律程序而唔可以自己 「私了」啦。 今次就先講住咁多先，下次再同大家分享一下有關物件同行程上既保障。

祝大家聖誕快樂，旅途愉快!

作者: 食啲飯
Email:stevenlui2015@gmail.com
如果有想知既題目同問題,歡迎話比我知. 下次再同大家見面。