小編去旅行｜東京旅行 趕唔切飛機點算好？

去到旅行最後一日，預咗坐 Skyliner 去機場。點知由池袋站去到日暮里 Skyliner 站先知道竟然無車！因為今年十月颱風影響，千葉縣果日朝早地震，搞到 Skyliner　同 JR 去成田機場嘅車都停駛。

到 Skyliner 站係下午四點半左右，其實都時間唔多，七點幾機。個職員話東京車站有巴士坐，咁惟有去博一博。因為東京搭的士都好貴，入機場都一萬YEN 起跳。

嗯，去到東京車站等巴士係超級多人，幻想下港鐵停駛嘅日子就知道。結果係趕唔到班機，香港朋友有幫手打去HK express，但打通。不過始終遠水不能救火。提醒自己下次要入定錢去Skype，有起事上嚟都打到電話丫。

去到機場個counter 已經無staff，所以最有用嘅方法都係要打去航空公司hotline，就算無得refund 都可以問下有無第二日機票、有無得平。

同行朋友商量過之後決定，即上 Skyscanner 重新買機票返香港，同埋搵機場酒店過一晚。返到香港搵過HK express CS，電郵回覆呢個情況下無法退款，只可以退返稅（大約百幾蚊）。

返到嚟上網睇過，原來都有人會因為搭錯JR 普通車趕唔到去機場，又或者人身事故導致鐵路停駛，睇嚟都係一件幾平常嘅事。

事件教訓小編....(同小編個荷包...)

• 去機場前check 下鐵路係唔係正常行駛
• 預先睇得酒店附近有無巴士坐去機場, 風險大嘅日子, eg 落雪/打風, 可能坐巴士仲好
• 裝 Skype 係電話, 有咩事可以打返香港
• 真係出事, 而又有得救, 果斷D 搭的士啦! (平過重新買機票)

暫時諗到係咁多...