小編去旅行｜東京池袋住宿分享

小編十月頭去咗東京四日三夜旅行，因為預算問題，所以都一早諗住入住池袋嘅酒店，去到都覺得呢個選擇唔錯，新宿站真係好多人，雖然周圍都有得行街同食嘢，但一諗到幾時都咁逼人就不了。

首先喺 Booking.com 搵池袋酒店，再sort by price 同考慮到地理位置，亦有上網睇過唔同人嘅評價。最後決定入住 東急STAY池袋 Tokyu Stay Ikebukuro 酒店，3晚大約HK$2,600（包早餐）。

網上圖片

當日落機由成田機場坐Skyliner 去日暮里站轉 JR 去池袋，買下車票、搵下路，大約一個半鐘左右就到酒店啦。

當中最吸引嘅賣點之一，係呢間酒店點算幾近JR 同 metro站，不過去到當地，拖住個行李箱，感覺係無幾分鐘咁近，哈哈！尤其JR站，其實要行過metro站同地下商店街再經C6出地面先到，憑個人體驗應該10分鐘左右。不過出到池袋站西口C6出口，就真係步行幾分鐘就到架啦！而係JR 向西口行，行行下你會發現見唔到C6出口嘅標示，不過一路向前行就可以了。

另一個方法就係JR西口出地面，再跟Google map 指示行過去。如果落雨或者唔鍾意行上地面，就可以一路係地底向西口方向行到見到C6出口指示為止。

酒店另一大賣點，係房間內有洗衣機，係check in時front desk職員會俾一包洗衣粉，係有需要嘅時候就可以開機洗衫啦！ 有些人說房間內比較大塵，由於我同朋友仔都無 check 得咁仔細，所以真係無留意到！如果比較講究衛生嘅你，要注意房間係住滿七日先會清潔一次，但房內毛巾係會日日換的。

詳情可以參考：
https://www.tokyustay.co.jp/chn_tc/cleaning/

廁所夠大夠用，唔會覺得逼，房間亦夠開兩個喼。有枱有櫈有電視。 早餐有飯、有麵包、肉丸（好味）、咖啡、茶，如果性價比來說，下次去都會入住的！

＞酒店預訂