中東空姐｜Georgia 小遊記之滑雪篇

作為係一間聲稱超過150個航點既公司工作，每日都飛唔同地方，dayoff又去玩，其實飛左一年已經飛到有點麻目，好似旅行就為左打卡去不同景點。所以係上年聖誕去完Gudauri 之後，我就決定左去旅行搵d野學下咁，為旅行添上另一層意義。所以就決定要學！滑！雪！

結果等左一年又淆淆地底要獨撚學滑雪，我終於係今年一月尾去左學啦！同唔到我flatmate一齊放假，所以我就一條柚去學，又唔想麻煩俄羅斯大叔，咁岩呀西伯利亞男生又唔係Gudauri，結果我最後就係冇人接應之下前往Gudauri!好有冒險既感覺！

由於唔知自己用自己一折既乞丐飛會唔會上唔到機，所以求其係網上面搵左private transport 黎接我去Gudauri 。司機係當地人，英文又講得唔錯，一邊介紹下景點咁又吹下水，大概三個鐘既車程好快就過去！冇諗過首都第一個購物商場會係十年前先落成！佢話georgia最近有好多改變，多左遊客去，老一輩的人怕會係唔好既改變，失去georgia既傳統！

而一直都覺得依個國家個個人都係好虔誠的東正教徒，而依位司機就話其實有10%既人係信回教，佢自己算係無神論者，尊重宗教信仰，並覺得佛教更加好！講下滑雪講下宗教又講下歷史，我話你講到自己冇咩點受過教育，但知道既野都幾多！

佢話其實佢之前讀讀下大學就因為覺得自己唔適合退左學，之後去左做兩年monk，覺得搵到自己想要既答案，之後就做private transport/tour既生意；知道咁多Georgia 歷史都係因為工作需要而不斷學習。佢仲話頭果兩年做tour工作既時候，英文唔好遊客問佢問題又唔識答，所以都係亂咁up,但係遊客好單純又會當真喎！不過佢話依加唔會咁做啦，會自己做好功課！

如果睇書可以增進知識，咁旅行遇到不同的人就是第一身了解到其他國家不同人不同的故事，這亦都係旅行的美妙同吸引之處。

第二日一起身就聯絡上次既滑雪教練，點知佢話佢要搞個比賽，三日都唔得閒，就介紹左佢個朋友教我。我係約定時間遲左5分鐘到，去到搵唔到佢個朋友，我心諗得我一個亞洲人樣好容易認姐，之後打比上次既教練，佢話佢朋友已經到左，叫我留意一下有鬚既人，周圍問下人咁。點知最後去問埋警察都搵唔到。後來有個人走過黎同我講話果位教練番左屋企，將我交左比佢教。聽到之後，除左無奈亦是無奈！！是但啦都係學滑雪姐！結果我4日都跟住依位教練學滑雪啦！

Perfect weather之

🇬🇪

Gudauri日常：
無敵雪山景+右手邊有free ride ski n snowboard 比賽睇+skiing

依個教練得23歲，點解全部教練都係咁後生既！英文唔算好好，但教滑雪都唔錯，幾take care我！而我flatmate早我幾日去搵上次教練個朋友教，佢話佢跌倒又唔扶佢又收貴左。我都算幾好彩搵到個唔錯既教練！後來最尾果日要轉酒店，佢仲幫我搵酒店同車我去機場添！

我好奇問佢咁你冬天就教滑雪，咁你夏天做咩工呢？佢話佢會車人由Tbilisi 去gudauri或kazebgi ，冬天教滑雪冇dayoff日日都要開工。所以雖然佢好想同我傾計，但好多時都唔知d詞語英文點講要用Google translate，佢話要等佢夏天得閒果陣先有時間學英文，仲約定我下年去搵佢會同佢傾到計，哈哈！我都希望下年可以再去我美麗的雪山，可惜既係辭職之後，香港同georgia就距離十幾個鐘既飛行時間啦，唔知幾時先會有機會再去啦！