中東空姐｜外站買什麼？

空姐每個月都飛唔同地方，個個月都有驚同喜。菜鳥空姐對於出更表真係好興奮，一出更表就計劃下個月去邊度玩或者去邊shopping!曾經我都係其中一個對更表有無限FF既空傭⋯⋯自從飛得耐左，大部分有興趣既地方都去左，又或者bid極都bid唔到已經冇晒期望同心已死，再加上自從公司比左340機我做之後，我既人生就只有每個月Colombo, Kuala Lumpur, Algeria不停loop（係上年年尾公司已經將340機既航點改左，自此我就冇咩點飛依架飛機，但依舊loop緊Colombo ，命運！）

自從果陣時開始，我既飛行生活就由期待拎到新航點轉為期待拎到買餸航點！你冇睇錯，我真係講緊買餸煮飯！去中東做空傭之前，我只係識烚菜煮白飯公仔麵同煮麵食，因為香港太方便，同埋有呀媽係度做咩要自己煮喎，出句聲就有得食啦！黎到中東，除左冇豬肉冇粵菜之外，仲有既係亞洲食品超貴、菜唔新鮮同埋冇好食既外賣！我依個十級懶人唯有向現實低頭—自己煮！

所以自從果陣開始，每個月我見唔到買餸航點我就會心情低落，見到買餸航點就會開心到前幾日就諗定有咩要買！例如去德國要買yoghurt同行dm,去西班牙就要買肉買海鮮買水果，去亞洲就要買金菇菜心白菜呀丸呀燒賣，去美國同澳洲就要買肥牛牛奶等等！

我諗各位係香港做空姐既同業們應該睇到依度應該覺得有點難以置信了吧？香港既空姐空少係去買名牌做代購，買到成喼都係水貨運番香港，而我地一班中東空姐空少，係買到成喼都係餸，見到同事個喼好似好重咁，第一個問題係：係咪買左好多餸呢？

除左買餸我地仲會係外站買日用品！我之前就同朋友為左買一支眼線筆，對比過新加坡香港吉隆坡同馬尼拉既價格，我地發現吉隆坡既價格係香港既一半，而馬尼拉既價格只係香港既三分一！人地百佳惠康就地區性格價，而我地就真係literally 既亞洲地區性格價！話時話下星期去馬尼拉又入番兩支眼線筆先hehe

PS:做咩突然想買下咁既文，係因為我係西班牙南部玩緊，而我去左超級市場行左個圈之後，已經好期待最尾果日去買餸，仲期待過去景點呀大佬～