中東空姐獨遊記｜高加索小國Georgia 小遊記之二

第二次去Georgia 就係9月尾近秋天的時候。今次俄羅斯大叔又咁岩要去Georgia 做野，所以就同（帶）我去睇秋景！雖然佢話佢都想去睇秋景，但其實我覺得有一半係佢係怕我一個人語言不通所以就同埋我去！

由於我係半夜到，所以先到Tbilisi 隔離既一個小鎮住！個鎮叫Mtskheta，係以前Georgia 既首都，有一個好有名的教堂！比起Tbilisi, Mtskheta比較清幽同冇咁共產。

第二日訓醒就去行左一轉個好出名既教堂，好虔誠既大叔仲搵到個人用英文講解帶我行一圈個教堂。Well去左咁多歐洲既教堂都係第一次聽人講解！原來耶穌死果陣著果件衫係埋係教堂下面，仲有少部份耶穌釘十字架既木，耶穌個妹都埋係依個教堂下面。

嘩！咁把砲？冇錯！所以如果去唔到耶路撒冷朝聖的話，相傳只要去依個教堂三次都有一樣效果。個教堂仲供奉左好多聖人，亦都因為係georgian心目中咁神聖，所以好多人黎依個教堂結婚！聽完講解咁岩有bb要受浸，所以就睇左陣個儀式。對於唔係天主教徒同基督徒既我黎講都幾新鮮！

之後就去Gudauri 進發啦！

好可惜既係雖然係山區但天氣仲係有d熱，所以仲未有秋景睇！山區天氣變化多端，突然落大雨，好彩已經到左酒店！酒店叫做Rooms hotel,係Georgia 好有名的酒店。因工作關係成日住酒店，但係依間酒店應該係我住過既Top3! 唔單止有大大個5千米高Kazebgi 既雪山景，間房同酒店既設計都好正!

第二日一早見到晴天就起身落去睇雪山啦！柔和既光線照射係雪山上，加上移動得好快既雲，再加上酒店播緊Adele 既Love song,構成一幅好短暫但係已經係我腦海難以忘記的畫面。雪山景每時每刻因雲層的移動同埋光線不同，都有不同既景色，真係好治癒😌

等到今日既司機黎到之後，就開始搵秋景睇啦！司機係一個來自西伯利亞既男生，佢之前係玩開跳傘但因為一些原因佢轉左玩paragliding,係Gudauri 住左五年，得閒飛下滑下雪咁！聽到我好羨慕！由於依個山頭凍少少同埋落雨降溫，睇到秋景啦😍！

高加索山脈都係因為火山活動形成，所以有一些係火山自然景觀。

同戰鬥民族去探索大自然，車子過了一條小溪之後，當時已經晚上8點。大叔說要在這美景喝熱茶，然後拿出gas同煲出來燒水，說要用中國傳統沖茶方法！

然後拿出小小的萬用刀來搞動茶葉，並說這是用來對付熊的！我說刀那麼小，怎樣可以擊退熊？大叔說熊會覺得這個人用這麼小的刀對付我，這個人一定很好打！（好特別既邏輯）然後西伯利亞男生說，熊應該會指著你笑，怎麼刀那麼小的！唔，這就是戰鬥民族的gag嗎？

之後車再往前行多陣，發現冇咩睇就原路折返。番到去同一個飲茶位，大叔又話停係度飲下茶！一打開車門，就見到好多牛（定羊？），原來係牧羊人趕牛！然後抬頭望向天空，睇到好多星星，之後西伯利亞男生把車頭燈關上，嘩，原來係銀河黎嫁！估唔到黎睇秋景點知仲比我睇到銀河！

大叔好驚訝我從來沒有睇過銀河，兩位戰鬥民族仲係度介紹依個係咩星果個係咩星添！西伯利亞男生話平時好天的話佢係屋企就睇到銀河，七八月仲睇到流星添！嫉妒死我啦！此時遠處閃下閃下咁，原來係閃電。遠方有閃電，上空就係銀河，對於我這個城市人來說係一個好奇妙的景色！