中東空姐｜多哈轉機有咩好玩？

近來番工多左好多人問我多hell有咩玩，原來係因為放寬左visa free，好多不同國家，包括香港都可以免費停留30日！

我平日放假係多hell通常會做既野係：訓覺、去超市同煲劇！但係今日就等我依個獨到爆、係度住左兩年既人，介紹下如果你咁不幸簡左係多hell轉機有咩玩啦！（絕對歡迎各位帶D香港食物過黎探我，只要唔係豬肉同酒就得啦！）

Souq 

Souq係一個政府支助本地人開既市集。好似個market咁有餐廳、shisha、cafe、中東神燈、手信咁上下。仲有條寵物街好似旺角金魚街咁賣下金魚雀仔咁啦，得閒仲有d show睇下咁，仲有近距離睇下駱駝咁啦。Souq距離機場25分鐘車程（唔塞車的話），如果停留時間短又想睇下多哈係點，souq係幾好既選擇！

Islamic of Art Museum 

好現代化設計既博物館，有時周末會有交響樂團係度演出，都幾多有品味既expats去睇嫁！而museum本身…帶頭盔先…我係未入過去睇，但之前搵個下入面有隻金雀咁既野係鎮館之寶！次次睇人去完post相都係影下博物館既外觀咁啦，可能外面吸引過里面掛！博物館行過少少有得坐船出去睇番多哈既景色，同埋去banana island，一個resort咁既島。

Karata  文化村

其實我一直都想去，但係太遠坐的士過去有點貴！所以一直都冇去！睇相都幾吸引，幾有伊斯蘭風！

The Pearl

其實有少少似杜拜果個Palm tree island,都係人工島，好多expat住既地方（呃唔係我依d廉價飛傭可以住到既地方）。我最近先第一次去，同樣因為坐的士去實在太貴啦！

但係果度真係多hell既仙境呀！感覺塵少好多，印度人少好多（成日我都話多hell係印度殖民地），環境就好似discovery bay咁啦，加埋中東既建築！隔離仲新開左假威尼斯住宅區，本人感覺仲靚過真威尼斯，因為真係好新好colourful!

Desert Safari Tour

黎到沙漠就一定要黎沙漠睇下啦！多哈既沙漠同杜拜唔同既係，多哈沙漠近海邊。一日有三個時段既tour,分別係早午晚。下午tour可以睇埋日落，夜晚tour可以睇星星。

個司機開住車衝落d沙度真係好正好似玩緊機動遊戲咁！每個tour可能因應司機都有少少唔同，我上次去果個係去inland sea為終點既。而我朋友去果個就帶埋佢地去本地人係沙漠住既屋參觀下咁！基本上個tour大約600riyals per car，大概4-5個鐘，包括pickup同drop off ，都幾方便！



仲可以比20蚊騎駱駝


Inland Sea D水都好清下

依個就係我地個司機

多hell比較有趣d既景點就係依幾個，基本上要去晒兩日都搞掂！最後講下d基本資料先：

錢：

本地貨幣叫Qatar riyals ，大概1riyals等於2.1港幣，riyals同美元掛勾，所以可以帶美金黎換

交通：

多哈既地鐵仲起緊，所以我地出入都要坐的士。的士都有兩種：Karwa , private taxi。karwa係Tiffany blue色的的士，係official taxi，司機係要按里數黎收錢既，但係佢地手車真係好差，我成日都暈車，仲成日扮唔識路，由機場出入黎要收25蚊稅添！

所以我好耐都冇坐啦。private taxi係limousine 先叫合法private taxi，比karwa貴少少但舒服d司機唔會扮唔識路。而我通常係多哈都會用uber,一黎價位係limousine 同karwa之間但有limousine 既舒服，出入機場唔使比稅，仲時不時有promotion code! 多哈早上同下午番工放工時間都會塞車，所以大家要趕飛機就預多少少時間啦！

此外仲有巴士，但係多數係印度巴基斯坦外勞坐既，不過有條777巴士線由機場去pearl都幾安全可以坐既

天氣：

Georgian 話係佢地既宗教黎講50度係地獄，而多hell既夏天就真係hell黎嫁！所以如果夏天黎轉機都係留係機場把啦！夏天通常係4-10月，冬天就15-20度。今年個冬天都幾唔凍，前兩日日頭已經27度，過幾日dayoff已經可以去游水啦！

飲食：

主要係中東或印度餐廳，而每年5-6月會係佢地既齋戒月，係有日頭果陣都唔可以係公眾地方飲食，唔可以係街邊行邊食！