空姐分享｜如何係大陸開戶用支付寶嗌外賣？

去大陸今時今日俾cash真係會俾人當堂斜視😒小妹見連路邊既賣串燒小販都收支付寶⋯聽聞乞丐都係收支付寶！？（呢個好L誇張），就知呢壇野將會成為主流，不過老老豆豆，依家電子支付又真係好方便，大陸錢成日都霉霉爛爛又污糟，面值又唔大，相信買家賣家都唔想收/俾下下都爛哂既人民幣⋯同埋內地好多商戶依家係用支付寶會平過俾cash呀！

馬雲爸爸說，就算乞丐被打刧也不怕。(網上圖片)

由於小妹打份牛工都成日飛內地，所以今次就的起心肝仔去北京開戶口！（留意返：因為小妹成日飛北京，所以先去果邊開，建議其他朋友仔最好去近自己既地方開戶（如深圳），因為每次存取都要收跨網手續費架！例如響北京開就永世都要係北京拎錢入錢先至免費，去上海禁錢會收charge）

咁我係咁耳講下開戶流程，小妹選擇係中國銀行開帳戶，其實去其他銀行都得既不過中銀覆蓋範圍大而且比起細銀行伏味無咁濃～去到銀行我就同職員講開個人帳戶，佢就俾兩份表你填，第一份係填個人資料。

此時你需要：
-大陸手機號碼（用作收驗證短訊，大陸開乜都要驗證碼）
-大陸地址（小妹填酒店地址都過關，如果大家開戶唔係用作投資買賣大生意此欄可以鳩填）
-回鄉證
-工作證明（俾左公司工作證有我個樣，佢用黎copy）

第二份就係有關報稅既野～
咁呢見到份表都打左個突，連稅務資料都要填？！份表主要係要你填報稅既類別（我寫薪俸稅）然後就係稅務編號（我寫E-tax個number，嘩好彩email history搵得返）

填完呢兩份表交俾職員入資料，佢最後會問你開戶目的，我好誠實咁同佢講用黎開支付寶，最後就成功喇！